Очигледно е дека има проблем меѓу Македонија и Бугарија и тој проблем им штети и на двете држави, но и на целиот балкански регион и на ЕУ, вели поранешениот заменик министер за надворешни работи на Бугарија Љубомир Кјучуков. Единствениот начин проблемот да се реши е преку политичкиот дијалог, и поради тоа Кјучукиов предлага прво да биде дефиниран поимот „заедничка историја“.
„Основниот проблем кој, според мене, треба да биде решен е дефинирањето на поимот „заедничка историја“, кое е содржано во Договорот за добрососедство. Да се дефинира како содржина и како период, во години. Тоа не може да биде направено од историската комисија, тоа може да биде направено само на политичко ниво. Прашањето за јазикот е решено во двостраниот договор, таму има формулација во однос на јазикот. Сите останати прашања се лесно решливи, смета Кјучуков.
За да започне политичкиот дијалог, потребно е двете страни да прекинат со говорот на омраза, вели тој и изрази уверување дека новата влада веднаш ќе биде подготвена да започне таков дијалог.
Во врска со утрешните избори во Бугарија, Кјучуков вели дека кој и да победи едно е јасно, ГЕРБ на Борисов повеќе нема да владее. Неизвесно е дали „Има таков народ“ на Слави Трифонов ќе успее да состави влада бидејќи нема да го има потребното мнозинство. Кјучуков не ја исклучува можноста да има малцинска влада со Трифонов како мандатар, но во најголем дел составена од експерти.
