Претседателката на Европската комисија Урсула фон дер Лајен ќе го донира револверот што како подарок го доби од турскиот претседател Реџеп Таип Ердоган на воен музеј, откако претходно ќе биде онеспособен за употреба, соопшти денеска портпаролката на Европската комисија, Паула Пињо.
Одговарајќи на новинарско прашање за необичниот подарок што турскиот претседател им го врачи на лидерите на НАТО за време на самитот, Пињо рече дека Фон дер Лајен му се заблагодарила на Ердоган за подарокот.
„Бидејќи станува збор за огнено оружје, тоа ќе биде безбедно транспортирано и складирано. Откако ќе биде онеспособено за употреба, намерата на претседателката е да го донира во воен музеј“, изјави Пињо.
Таа одби да даде дополнително толкување за значењето на подарокот.
„Ќе ви оставам на вас да го толкувате, бидејќи сигурно постојат повеќе можни интерпретации. Ова беше подарок што го добија сите лидери кои учествуваа на самитот на НАТО и немаме што дополнително да додадеме“, рече портпаролката на Европската комисија.
Според информациите, турскиот претседател на лидерите што присуствуваа на самитот на НАТО им подарил револвер и шест куршуми, со цел да ја промовира растечката одбранбена индустрија на Турција.
Не сите лидери успеале да ги понесат подароците со себе поради строгите прописи за поседување и внесување огнено оружје во нивните земји, додека дел од нив, како и Фон дер Лајен, одлучиле оружјето да го донираат во музеи.