Во неделниот извештај од Институтот за јавно здравје за периодот од 6 до 12 јули годинава, стои дека е значително зголемување на бројот на оздравени лица, а намалување има на бројот на починати во споредба со претходната недела.
Бројот на оздравени е рекорден и изнесува 1017, што е за 404 лица или 40% повеќе од претходната недела, односно од 29 јуни до 5 јули.
Во дадениот период направени се вкупно 9.995 тестирања, односно 1.573 повеќе од предходната недела. Регистрирани се 1.073 позитивни случаи на Ковид-19 што е за 156 случаи повеќе од претходната недела.
Од новозаболените во овој период најголем процент се лица над 60 години 22,8%, поголем број новозаболени се регистрира кај лица помеѓу 30-39 – 20,1%, потоа кај лица од 50-59 години – 19,3% и помеѓу 40–49 години – 18,8%. Најмал број на новозаболени има кај децата и тоа 0-9 години – 3.7%, и од 10-19 години – 3,3 % од вкупниот број на новозаболени.
Од вкупниот број на епидемиолошки истражените новозаболени 42,6% имале контакт со потврден случај на Ковид-19, а 22 лица имале историја за патување во странство во минатите 14 дена.
Во периодот 6 до 12 јули, регистрирани се 36 смртни случаи, што е 10 помалку смртни случаи од претходниот период. Најголем дел од случаите се лица над 60 години, 69,4%. 35 од случаите се починати во болнички услови, а 1 вон болнички. Кај 29 од смртните случаи (80,6%) регистрирани се претходни коморбидитети. Во последните три недели константно се намалува бројот на смртни исходи на Ковид-19, се вели во извештај од Институтот за јавно здравје.
Билјана Ставрова