Скијачот Дардан Дехари ќе биде единствен знаменосец на Македонија на утрешното свечено отворање на Зимските Олимписки игри во Пекинг. Ана Цветановска отпадна од комбинација, поради позитивен тест на Ковид-19 на нејзиниот тренер.
Првично беше предвидено Дехари и Цветановска заедно да го носат македонското знаме на отворањето, но нашата нордијка нема да може да ја има таа чест. Цветановска иако е негативна на коронавурисот на досегашните тестови, поради близок контакт со нејзиниот тренер Борче Јовановски преземени сите мерки на претпазливост. Од Македонскиот олимписки комитет велат дека доколку Јовановски има два последователни негативни теста веднаш ќе може да се врати во олимпиското село и да го напушти хотелот во кој е сместен поради карантинот.
Токму Цветановска е нашата прва преставничка на Игрите и треба да настапи на 5.февруари, а потоа и на 10 февруари во крос кантри. Вториот наш нордиец, Ставре Јада исто така ќе настапи во две дисциплини на 8 и 19 февруари, а скијачот Дехари ќе се натпреварува во слалом и велеслалом на 13 и 16 февруари.