Земјотрес со јачина од 5,5 степени според Рихтеровата скала го погоди планинскиот регион на Андите во Перу, при што загинаа најмалку шест лица, повеќе од 30 се повредени, а околу 300 жители се раселени. Според американскиот Геолошки институт, епицентарот бил во близина на градот Сикаја во провинцијата Хуанкајо, на длабочина од 10 километри.
Перуанските власти соопштија дека повеќе објекти се урнале или претрпеле сериозни оштетувања, меѓу кои и историската црква и поранешниот манастир „Сантијаго де Леон“ во Чонгос Бајо, објект од 16 век кој е прогласен за национално културно наследство. Бројот на исчезнати сè уште не е конечен.
Локалните власти посочија дека голем дел од штетите се должат на традиционалните градби од необработена глина, кои се особено ранливи при силни земјотреси. Перу се наоѓа во Пацифичкиот „Огнен прстен“, една од најсеизмички активните области во светот.