Во снежна бура што ги зафати САД загина најмалку седум луѓе, 800.000 домаќинства останаа без струја и над 11.000 летови се откажани.
Најмалку две лица починале од хипотермија во Луизијана, соопшти државното министерство за здравство. Смртни случаи поврзани со бурата се пријавени и во Тексас, во Тенеси и во Канзас.
Во Канзас, тело на една жена било пронајдено во снег, а властите наведуваат дека „веројатно подлегнала на хипотермија“. Речиси половина од американските сојузни држави прогласија вонредна состојба.
Гувернерката на Њујорк, Кети Хокул ги повика граѓаните да останат дома и да избегнуваат патувања, предупредувајќи дека станува збор за „најстудената зимска бура во последните години“.
Експертите објаснуваат дека причина за екстремното време е поларниот вртлог од силни ветрови над арктикот кој, кога ќе ослабне, дозволува студениот воздух да се спушти кон југ. Температурите во Тексас, во Луизијана и во Тенеси се и до 20 степени целзиусови под сезонскиот просек, невообичаена појава за овие региони.