Сојузот на синдикати на Македонија (ССМ) и Организацијата на работодавачи (ОРД) остануваат длабоко вкопани во своите ровови, кога станува збор за минимална плата во висина од 450 евра, а Владата порачува дека за нив е прифатлив било каков постигнат договор меѓу нив.
На денешната втора седница на Економско социјалниот совет (ЕСС), најмногу време се посвети на Буџетот за наредната година и сумите предвидени за исплата на плати во јавниот сектор. Од Синдикатот се задоволни што се предвидени, речиси, 14 отсто повеќе средства и нагласуваат дека нема да има поместување по однос на нивното барање – минималец – 450 евра.
Од Организацијата на Работодавачи велат дека на денешната седница воопшто не станало збор за покачување на минималната плата. За барањето на Синдикатот остануваат на ставот дека е паушално, а минималната плата ќе се покачува согласно законот.
Премиерот Христијан Мицкоски соопшти дека Владата ќе чека Синдикатот и работодавачите да се договорат и ќе поддржат било какво решение. Тој е дециден дека во Буџетот има пари, а зголемувањето на минималната плата ќе биде на товар на работодавачите, што ќе донесе повеќе пари во Буџетот. Доколку се јави потреба секој проблем ќе биде решен со ребаланс на Буџет.
Во Буџетот за 2025 година, кој сè уште е во Собрание, предвидени се 105 милијарди денари за исплата на пензии, со што ќе се покрие и најавеното зголемување на пензиите од 2.500 денари во март и околу 53 милијарди денари за исплата на плати за вработените во јавната администрација.
Огнен Чанчаревиќ