Поранешната претседателка на Државната комисија за спречување на корупцијата (ДКСК), Слаѓана Тасева, смета дека отсуството на носител на висока јавна функција не смее да предизвика застој во работата на институциите и отвори прашања за евентуална одговорност поради недоаѓањето на работа на вицепремиерот задолжен за добро владеење.
Тасева рече дека во изминатите месеци не забележала активности поврзани со ресорот за добро владеење и оти јавноста не добила доволно информации за функционирањето на кабинетот.
„Не забележав во изминативе месеци дека нешто се случува на тој план или некаква активност од тој кабинет за добро управување. Ние знаеме дека вицепремиерот не доаѓа на работа, меѓутоа немавме информации што се случува со работењето на тој план“, изјави Тасева.
Таа оцени дека објаснувањата кои биле дадени за неговото отсуство се несоодветни со оглед на значењето на функцијата што ја извршува.
„Треба да има јасни правила. Ако некој не може да ја обавува функцијата, треба веднаш да го најави тоа, а Владата треба да се организира за да нема застој. Сега имаме застој, а останува прашањето како и зошто се случило тоа и дали ќе има некаква последица. Зошто не добил отказ ако не дошол три дена на работа? Навистина има многу прашања“, рече Тасева.
Таа додаде дека институциите мора да обезбедат континуитет во работењето без оглед на тоа дали одреден функционер е присутен или отсутен од работното место.
T.Д.