Еден српски државјанин, двајца вработени во регионалната дирекција на УЈП Скопје и уште седуммина сопственици, директори и вработени во фирми од Скопје и Гевгелија заработија обвинение за финансиски криминал тежок 6,5 милиони евра. Обвинителството за гонење организиран криминал и корупција соопшти дека Србинот кој бил сопственик и управител на две фирми, и двајцата службеници од УЈП биле организатори на групата, на која подоцна се приклучиле другите бизнисмени.
Тие се организирале за, со прикажување невистинити податоци, да затајуваат данок и неосновано да бараат поврат на ДДВ. Според обвинителството, вака затаените пари потоа ги пуштиле во оптек, односно ги испрале.
Сите десет лица се обвинети за сторено кривично дело Злосторничко здружување, а на тројцата организатори им се става на товар и дека сториле продолжено кривично дело Даночно затајување и кривично дело – Перење пари и други приноси од казниво дело.
Групата била создадена во текот на 2023 година, а потоа им се приклучиле и други сопственици, управители и вработени во правни лица во Скопје и Гевгелија.
Првообвинетиот, со намера да одбегне целосно или делумно плаќање данок во годишните даночни биланси доставени до Управата за јавни приходи, дал лажни податоци за своите приходи и за приходите на правните лица, со што избегнал да плати данок од значителна вредност во вкупен износ од 16 782 519 денари. Останатите осомничени сопственици и управители на правни лица го довеле во заблуда даночниот орган давајќи лажни податоци во поднесените даночни пријави, за враќање на данокот на додадена вредност со што го оштетиле буџетот во износ од 33 620 551 денари.
Дополнително, во истиот период, дел од обвинетите со цел прикривање на потеклото на парите прибавени со кривични дела, пуштиле во оптек вкупно 401 227 898 денари.
Обвинителството, бара на седуммината обвинети да им се продолжи притворот, а достави и предлог за конфискување на движен и недвижен имот од осомничените во висина на предизвиканата штета на буџетот.