Членовите на избирачките одбори од Битола, кои беа ангажирани за локалните избори одржани во октомври минатата година, се жалат дека се уште не ги добиле целосно надоместоците за својата работа. Ова прашање беше отворено и на последната седница на Советот на Општина Битола. Откако градоначалникот Тони Коњановски кажа дека голем дел од ставките во минатогодишниот буџет имаат стопроцентна реализација, опозицијата побара одговор зошто се уште не се исплатени средствата за избирачките одбори.
„Поминаа четири месеци од завршувањето на изборите, се обраќаат граѓани кои биле ангажирани и прашуваат кога ќе им бидат исплатени средствата. Кога толку добра е ситуацијата во Општината, мислам дека е редно после четири месеци да им се исплатат средствата на луѓето, изјави Александар Дракуловски, советник од СДСМ.
Градоначалникот Тони Коњановски најави дека исплатата ќе заврши до крајот на март.
„Целта на учеството во избирачки одбор е да дадете нешто за државата. Ве избрале и треба оваа граѓанска должност која секој треба да ја чувствува да ја одработите најдобро што можете. Одговорностите се погромни, но се надевав дека луѓето не го прават тоа за финансиски надомест. Меѓутоа, точно е тоа, државата предвидела и средствата ќе бидат исплатени до крајот на месецот“, изјави Тони Коњановски, градоначалник на Битола.
Инаку, членовите на избирачките одбори се избираат по случаен избор од редот на вработените во администрацијата, а за нивниот ангажман за време на изборите им следува надомест, утврден согласно правилникот на Државната изборна комисија. На членовите од Општина Битола досега им се исплатени 25 проценти од сумата.
Емилија Мисирлиевски