Висок офицер на грчкото воено воздухопловство е уапсен под обвинение за шпионажа, откако наводно пренесувал строго доверливи воени информации до Кина, соопштија владини и безбедносни извори, пишува Катимерини.
Станува збор за еден од најсериозните случаи на шпионажа откриени во Грција, поврзан и со протекување информации од значење за НАТО. Според истрагата, офицерот користел специјализиран енкриптиран софтвер и уред обезбеден од кинески служби за фотографирање и испраќање класифицирани документи во странство.
Тој бил командант на ескадрила задолжена за телекомуникации и електронски системи и имал пристап до чувствителни податоци од грчките вооружени сили и сојузничките земји. Истрагата започнала откако американската ЦИА ја информирала грчката разузнавачка служба за протекување НАТО-информации кон Кина.
По апсењето во регионот Атика, осомничениот наводно признал дека бил регрутиран од кинески разузнавач и дека пренесувал податоци за пари, додека властите испитуваат дали во случајот биле вклучени и други лица.
