Текстилната индустрија ја очекува потешка година, бидејќи се намалени нарачките, а странските партнери, поради ниските трошоци, се префрлија во Бангладеш и други земји на Далечниот Исток, е оценката на Ангел Димитров од Организација на работодавачи. Димитров забележува дека македонскиот текстил ја изгуби својата конкурентска способност во однос на земјите на Далечниот Исток, каде што платите на работниците се 150 долари, иако продуктивноста на македонските работици е повисока за 30%, но платите во Македонија се повисоки за 300%.
Димитров посочува дека на македонската текстилна индустрија потребна ѝ е помош од државата, но како што вели свесни се за ограничените можности, бидејќи македонските фондови се празни. Една од мерките кои ќе ја бараат од Владата и ќе биде предложена и на Економско-социјалниот совет е повторно враќање на пазарот на девизи во земјата.
„Евентуално некое мало решение би помогнало кога би се пуштил пазарот на девизи во Македонија, да ние сами си ги продаваме девизите, а не банките да ни ги земаат по некој официјален курс со што заработуваат од продажбата на девизите. Такво решение имаше пред 10-15 години, не знам зошто се укина“, вели Димитров.
Според проценките на бизнис секторот, во текстилната индуструија се бележи најголем пад на бројот на вработени и во оваа индустрија останаа да работат 20.000 работници, а лани беа затворени десетина конфекции и тоа речиси сите во источна Македонија.
Викторија Јованова