Професорката Арлинда Кадри Шахиновиќ и адвокатката Сузана Јошевска Анастасовска се избрани за нови членови на Судскиот совет од страна на Собранието. Тие беа предложени од претседателката Гордана Сиљановска Давкова и треба да ги пополнат испразнетите места на Весна Дамева и Милјазим Мустафа чиј мандат заврши.
Сиљановска Давкова образложувајќи ги нејзините предлози пред пратениците порача дека идејата и била со нови профили на личности да се реформира Судскиот совет и да се зголеми довербата во судството. Двете кандидатки не ги избрала пред се дека се жени, туку поради нивната стручност и компетентност.
Од Кадри Шахиновиќ, претседателката смета дека може да се очекува посветеност, ангажман во границите на правото и поделбата на власта, како и одбрана на независноста на судството.
„Верувам дека она што самата го тврди, спремноста за одговорн, совесно и непристраност изввршување на функцијата во Судски совет дека ќе ја реализира“, рече претседателката.
За Јошевска Анастасовска се определила поради нејзиното искуство и досегашна работа, како и нејзината препознатливост во јавниот простор.
„Ако сакаме да го реформираме судството мораме да почнеме од органот кој што оценува, мери, евалуира и одлучува судии. Мислам дека таа е способна да го направи тоа“, додаде Сиљановска Давкова.
Дилеми за предложените имиња и искреноста на целиот процес имаа од пратеничката група на ДУИ бидејќи дејствувањата на Сиљановска Давкова биле во линија со политиката на ВМРО-ДПМНЕ, која пак предлагала интерпелација на членови на Судски совет со цел тие да бидат тргнати и заменети со послушници.
Претседателот на Судски совет, Александар Камбовски изјави дека не се сомнева во изборот на претседателката и дека одбрала вистински професионалци.
„Претседателката е пред се правник, професор и не се сомневам во нејзиниот избор и верувам дека избрала вистински професионалци кои ќе придонесат во работата на Судскиот совет, секако ако ја добијат довербата од Собранието“, посочи Камбовски.
Јошевска е адвокатка повеќе од две децении и е дел од јавните дебати за состојбите во правосудството. Шахиновиќ е вонредна професорка на приватниот МИТ Универзитет во Скопје и беше дел и од првата комисија за помилување на претседателката Силјановска.
Марија Митевска
Б.С.