Десетици илјади граѓани излегоа на улиците на Софија и други поголеми градови во Бугарија, барајќи фер избори и независно судство кое ефикасно ќе се справи со широко распространетата корупција во земјата. На транспаренти кои ги носеа граѓаните можеше да се види дека не го сакаат еврото како бугарска валута.
Демонстрантите порачаа дека земјата со децении нема вистинска политичка промена и побараа ново лидерство.
Протестите следуваат по минатонеделните демонстрации предизвикани од владините буџетски планови, кои предвидуваа зголемување на даноците и јавната потрошувачка.
Иако спорниот буџет за 2026 година беше повлечен, политичката криза се продлабочи, а владата на крајот поднесе оставка, оставајќи ја земјата без редовен кабинет и буџет… Претседателот Румен Радев се очекува да назначи техничка влада и да распише нови вонредни парламентарни избори, осми по ред од 2021 година.
Демонстрантите бараат избори без купување гласови и манипулации, како и одговорност во правосудството, само неколку недели пред Бугарија да се приклучи на еврозоната на 1 јануари.