Резолуција за мигрантите сепак ќе има, но не таа што ја бара опозицијата. Владејачката ВМРО ДПМНЕ најави дека уште утре во Собранието ќе поднесат „Резолуцијата за осуда на манипулациите на опозицијата и за потврда на политиките против нелегалната миграција“.Составена е од 9 точки, и во неа стои дека се осудуваат дезинформациите за наводно прифаќање на мигранти и изградба на кампови, се потврдува дека такви политики не постојат ниту ќе постојат, се поништуваат сите претходни аранжмани на владата на Заев поврзани со мигрантски кампови и се повикува на одговорен јасен говор, заштита на безбедноста, стабилноста и меѓуетничките односи. Исто така, се констатира дека свесното ширење дезинформации ќе биде санкционирано согласно важечките закони.
Оваа, според Мицевски, воспоставува јасна државна политика против нелегалната миграција и ќе стапи на сила веднаш по нејзиното изгласување.Ги поканија сите парламентарни партии заедно да ја поддржат.
Од СДСМ, пак, реагираа на одбивањето на ВМРО-ДПМНЕ да ја потпишат нивната Резолуција.
Минатата недела од СДСМ побараа да се потпише резолуција со која ќе се гарантира дека Македонија нема да прима мигранти кои се одбиени за азил од Велика Британија.
Темата за мигрантите стана предмет на политички препукувања уште со потпишувањето на Договорот за стратешко партнерство. Владата неколкупати демантираше, но за опозиицјата овие негирања не се доволна гаранција.
Далиборка Демјанска