Девет милиони евра од тендери за фирма основана пред една година со двајца вработени. СДСМ ја обвинува владејачката ВМРО – ДПМНЕ дека преку фирмата „Дигитал оне“ испумпува пари од Буџетот од Владата демантираат и тврдат дека се е според законот.
Според опозициската СДСМ, Генералниот секретаријат на Владата е најчест клиент на оваа фирма и најавуваат дека ќе продолжат да објавуваат сомнителни и коруптивни информации и аспекти поврзани со оваа фирма.
„ Фирма без историја, без искуство, без портфолио – регистрирана за трговија со информатичка и комуникациска опрема добива речиси 9 милиони евра за само 6 месеци. Или по 1,5 милиони евра месечно. Основана е од извесен Кристијан Арсовски и има само двајца вработени. Да, добро слушнавте, 2 вработени, со речиси 9 милиони евра добиени пари од граѓаните. Од шест државни тендери, дури четири се со Генералниот секретаријат на Владата на Мицкоски“ – вели Александар Саша Димитријевиќ, генералниот секретар на СДСМ.
Според официјално достапните податоци фирмата со седиште во скопски Аеродром е основана кон крајот на август минатата година со минимален основачки влог од пет илјади евра а како сопственик и одговорно лице се јавува Арсовски.
Во периодот од 14 мај до 20 ноември ги склучува шесте тендери вредни над половина милијарда денари.
„ Како е можно за толку кратко време фирма со двајца вработени да добијат речиси 9 милиони евра? Ако ова не е класична шема за испумпување на парите на граѓаните преку фирми блиски до власта тогаш што е? Повикуваме Јавното обвинителство, Финансиската полиција и ДКСК веднаш да реагираат, да отворат истрага“ – рече Димитријевиќ.
Од Владата за Телма соопштија дека договорот на Генералниот секретаријат за виртуелна платформа е тековна централизирана набавка за која имало договор која истекува наредниот месец и дека овој тендер бил спроведен исто како и претходниот пред три години со разлика дека сега фирмата имала повеќе
„Во однос на другите два договори за набавка на сервери и компјутери би сакале да ве известиме дека се склучени по принципот на економичност и совесно работење , наместо Владата да плаќа за хост на приватни правни лица, сега за прв пат поседува сервери на кои самостојно ги хостира владините апликации. Третиот споменат договор исто така е склучен во транспарентна постапка за набавка на компјутери за тековно и нормално работење на владата, станува збор за 150 компјутери набавени по најниска понудена цена“ – тврдат од владата.
СДСМ соопшти дека ќе соопшти уште детали за овој случај во рамките на најавеното објавување на серија коруптивни скандали на актуелната Влада и премиерот Христијан Мицкоски.
Огнен Чанчаревиќ