Албанската опозиција од денеска ќе започне со редовни протести пред Владата во Тирана, најавувајќи дека демонстрациите ќе продолжат „сѐ до уривање на наркорежимот“.
Лидерот на Демократската партија, Сали Бериша, изјави дека протестите засега ќе се одржуваат секој понеделник.
Бериша порача дека масовните и одржливи протести се единствениот начин да се спротивстават на актуелната власт, која, според него, ја претворила Албанија во „диктатура заснована на дрога, криминал и корупција“.
Тој ја обвини Владата и за, како што рече, „изборната фарса“ на парламентарните избори од 11 мај, повикувајќи се на наоди од извештајот на ОБСЕ/ОДИХР.
Протестите ќе се одржуваат под мотото „Протестирам, за семејството, за економијата, за демократијата“, а Бериша ги повика граѓаните да се приклучат во, како што ја нарече, „историска мисија“ за враќање на слободниот глас.