Најмалку десет лица загинаа, а неколку се повредени во пожар кој синоќа избувна во дом за стари лица во Тузла, Босна и Херцеговина. Според информациите на локалните медиуми, бројот на жртви може да порасне, бидејќи дел од повредените се во критична состојба. Пожарот бил локализиран околу 22 часот, но зградата е сериозно оштетена, а пожарникарите и во текот на ноќта ја следеле состојбата. Од Министерството за внатрешни работи на Тузланскиот кантон потврдија дека сите расположливи екипи биле испратени на терен. Во моментот на избивањето на пожарот во домот имало повеќе од дваесетина станари и вработени, од кои најголем дел се евакуирани. Очевидци сведочат дека пламенот се проширил многу брзо, а дел од штитениците не успеале да излезат навреме. Лекарите на Универзитетскиот клинички центар во Тузла згрижиле најмалку пет повредени, најголем дел од нив поради труење од јаглерод моноксид. Полицијата спроведува истрага за причините на пожарот, а според неофицијални извори можно е огнот да избувнал поради електричен спој или неисправен уред за греење.
