Во саботата е примено на болничко лекување, а во неделата почина седумгодишно девојче од тетовски Челопек. Семејството преку социјалните мрежи изрази револт и сомнеж за медицинска небрежност. Се бара здравствените и правосудните органи да го испитаат секој аспект од случајот.
Од болницата велат дека девојчето било примено на Одделението за педијатрија во саботата во 20:40 часот со мускулни болки низ цело тело и во дехидрирана состојба по што е почната рехидратација. Се појавила потреба од интервенција на друго одделение, на Оториноларингологија
„Била побарана помош од ОРЛ за аспирација на секрети од усната шуплина. За жал, за време на интервенцијата, пациентката не покажа знаци на реакција, по што беше итно префрлена на Одделението за анестезија, реанимација и интензивна нега, каде што беа преземени сите мерки за реанимација. И покрај максималните напори на медицинскиот тим, пациентката почина“, изјави Ерзен Елези, директор на КБ Тетово.
Директорот соопшти дека побарале да се направи судско-медицинска обдукција, но според него семејството одбило. Од болницата велат дека се подготвени за соработка со надлежните институции за секое дополнително појаснување поврзано со овој случај.
Покрај болничката комисија која е формирана за да открие што се случило, и Министерството за здравство ќе го испитува предметот, најави министерот Азир Алиу.
„Исто така и ние формиравме наша комисија која ќе оди на терен и ќе ги испитува сите процеси. Дозволете вакви случаи да ги анализираме и потоа да излеземе во јавност“, рече министерот за здравство, Азир Алиу.
Од Обвинителството информираа дека тетовски јавен обвинител веднаш по настанот бил известен дека има инцидент со оштетување на имот на болницата. Откако ја утврдил причината за инцидентот, обвинителот вчера издал усна, а утрово и писмена наредба за обдукција на телото на починатото девојче.
Александар Самарџиев