Уредите на лабораторијата животна средина Амбикон од штипскиот Универзитет почнаа да го мерат воздухот во Трубарево околу фабриката за рециклирање на електронски отпад и пластика. 5 дена 24 часа на ден со два типа на уреди се собираат честички на филтри а потоа ќе бидат анализирани во лабораторија.
Прелиминарните резултати ќе се знаат за една недела. Ќе се анализираат 32 елементи од натриум до ураниум. За да се утврди колкава е зоната на контаминација потребни се дополнителни информации, но и истражување и на почвата и на водата смета ректорот Мираковски.
„Зоната на дисперзија е многу тешко да се оцени и зависи од количината и видот на материјалот што гори, какви се над атмосферските услови, генерално зависи од типот на пожарите но индикативно е тоа што го спомнаа единиците на АРМ што тестираа квалитетот на воздух, зоните радиусите не се екстремно големи, иако расфрлањето на честичките може да биде во екстремно голем радиус. Кога се расфрла во поголем радиус и концентрацијата се намалува. Јас искрено се надевам дека освен непосредната зона нема многу широко распространета контаминација но тоа мора да се докаже“, изјави проф. д-р Дејан Мираковски, ректор на УГД Штип.
При горење на литиумски батерии и пластика се формираат гасови и честички а дел од нив се многу токсични вели ректорот Мираковски но во конкретниот случај сè зависи од тоа е што точно горело – информација која тој во моментот ја нема.
Се очекува да бидат готови и резултатите од лабораторија ’Еуромак контрол‘ која ги испитува мострите земени денот кога избувна пожарот во Трубарево.
Елена Ивановска Мукоска