(ФОТО Архива, гласање по точка на дневен ред во Судски Совет на РСМ) Дошле, зеле она за што имале наредба и заминале. Така се одвивала денешната полициска посета на Судскиот Совет кој по завршување на работното време беше темен и затворен.
МВР по допрен глас за фалсификувани записници побарало наредба од обвинителството за да одземе документите и да ги провери наводите. Обвинителството им дало наредба и полициските извршители зеле записници под сомнеж дека кријат кривично дело. Допрва ќе се анализираат.
-Полициски службеници по Наредба на ОЈО Скопје постапуваат во Судски совет, односно се обезбедуваат два записници за да се проверат евентуални елементи на кривично дело, кратко соопштија од обвинителството.
Од обвинителството појаснуваат дека денешните истражни активности не се поврзани со отворениот предмет за Енвер Беџети, апелациониот судија кој заедно со Артан Груби, пред три дена, заврши на американската црна листа поради докази за примање мито за судските процеси за Сашо Мијалков.
Фалсификувани записници во Судски Совет прв ги спомна премиерот Христијан Мицкоски од собраниска говорница, по што доскорешната претседателка на Судскиот Совет Весна Дамева си поднесе оставка и го обвини Мицкоски за политички притисок и мешање во судската власт. Му порача на Мицкоски дека ако смета дека има докази за неа треба да пријави во обвинителството. Една недела после оставката, МВР и полицијата почнаа постапка со побарана и добиена наредба од обвинителството.
Според информации на Телма станува збор за записници од состаноци и средби на кои се расправало за траењето на мандатот на Дамева на чело на Судскиот Совет.
Миомир Серафиновиќ