Бројни членови и симпатизери на Европскиот фронт вечерва се собраа пред Уставниот суд. Најавуваат дека тука ќе останат дено-ноќно до среда, кога судиите треба да расправаат за Законот за јазиците.
Адеми ги повика сите етнички заедници да му се придружат на Европскиот фронт во иницијативата Стража за јазикот. Се сомневаат дека се подготвува укинување на овој закон, но и на придобивките од Охридскиот мировен договор, кој за нив е гаранција за еднаквост и праведност. Тоа, според ДУИ, ќе значи дека од мултиетничка, Македонија ќе стане моноетничка држава, според планот на ВМРО-ДПМНЕ. Почнал да се реализира со претходната одлука на Судот за укинување на етничкото изјаснување во матичната евиденција.
Одлуката на Европскиот фронт беше поздравена со гласно скандирање.
Премиерот Мицкоски не очекува на 11-ти декември Уставниот суд да донесе одлука. Се сомнева дека намерата на ДУИ е да создава поделби по етничка основа.
„Во среда нема ништо да се случи затоа што има процедури, подготвителни седници итн. Но тие повторно ги злоупотребуваат Албанците но и Македонците, ги малтретираат и останатите со обиди за поделби и да привлечат внимание. Ги молам сите граѓани, и Македонци и Албанци и сите – да бидат спокојни. Ова е изолирана група на поранешни високи владини функционери за кои постојат основани сомненија за сторен огромен криминал“, изјави премиерот Христијан Мицкоски.
Законот за јазиците беше оспорен пред Уставниот суд со 12 иницијативи уште пред пет години. Меѓу иницијаторите се ВМРО-ДПМНЕ, Левица, организации, адвокати, професори… Се оспорува законот во целина, процедурата на донесување и објавување, како и службената употреба на албанскиот јазик. Двајцата судии Албанци најавија дека нема да присуствуваат.
Соња Николовска