ЕСМ ќе ја тужи „Марковски компани“ поради непочитување на договорот, заради што вчера од РЕК Битола соопштија дека го раскинуваат. Склучен е во февруари и тежи 46 милион евра. Не се ископувало доволно јаглен и не ги почитувал обврските.
„АД ЕСМ, согласно своите обврски и надлежности, ќе ги преземе сите чекори пред управните и судските органи кои ги има на располагање и на кои е обврзано со закон, имајќи ги предвид сите последици кои се произлезени од несовесното и неквалитетно извршување на договорните обврски“, се вели во дописот од ЕСМ.
Во договорот, освен што стои дека РЕК Битола има право да наплати пенали заради неисполнување на обврските, пишува и дека страните нема да сносат никаква одговорност, само во случај ако не се почитува договореното поради виша сила – терористички напад, епидемија, елементарни непогоди.
Пративме прашања и до компанијата „Марковски“ на мејлот кои е запишан во Централен регистар – дали навистина има пропусти или, пак, станува збор за виша сила, дали гледаат политичка заднина на сето ова, колкави се штетите и дали ќе тужат заради раскинување на договорот. Но, одговори од таму до објавување на прилогот не добивме.
Од РЕК Битола велат дека додека се најде фирма за ископ, количините ќе се покриваат без надворешна механизација со зголемување на ископот на јаглен од рудникот Суводол и со набавки, генерално, од Грција.
Механизацијата за ископ е проблем со кој долги години се бори комбинатот. Во 2021 година, ЕСМ набави свој машини во вредност од 17,5 милиони евра, но тогаш се зборуваше дека нема кадар кој да управува. Сега од РЕК Битола тврдат дека се прават напори со реорганизација на луѓето да се користат.
Комбинатот сега работи со три блока, но и се набавува електрична енергија. За овој месец ЕСМ ќе потроши над 14, 6 милиони евра за да купи струја. Парите одат во џебот на четири фирми трговци.
Инаку, според анализата на Центарот за граѓански комуникации, прв на листата со најмногу добиени тендери е токму компанијата „Марковски компани“.
Владејачката ВМРО-ДПМНЕ, кога беше опозиција, ги критикуваше договорите на тогашната владина гарнитура со Марковски, но скоро склучи договор со компанијата со образложение дека дале пониска цена.
Ирена Чачкова