Малолетник и тројца возрасни палеле, симнале знаме од јарбол и го газеле со задните гуми од автомобилот. Ќе одговараат кривично дека поттикнале национална, верска и расна нетрпеливост, најави министерот за внатрешни работи Панче Тошковски.
Учесниците во тепачка се зад решетки. И полицијата чула рафални и поединечни пукања, но по пиштолџиите се трага.
Прославата по повод Денот на албанското знаме која се разгоре во ноќта, пеплоса знамиња, а поединци вкрстија тупаници, за Тошковски е причина полицијата да се сомнева во организатори на насилствата.
„Жестоко ке одговориме на секоја провокација“, порача министерот, прашан од новинарите дали синоќа полицијата на почетокот затаила и нередите се рашириле.
Доцна ноќеска дивеењето се оддалечи од местата каде што организаторите пријавиле и најавиле прослава на Денот на албанското знаме.
Во Скопје, без никаква најава, колoни возила и граѓани блокираа неколку крстосници и булевари. Во Куманово групи и поединци оштетиле шест возила во центарот на градот за време на дивеењето.
И Тетово не остана имуно на провокации. Покрај албанското знаме, низ Тетово вчера се вееа и знамиња со голема Албанија.
Покрај овој инцидент и покрај тоа што законот наложува, македонското знаме го немаше никаде. Според законот, во локалните самоуправи во кои над 50 отсто од населението се припадници на заедницата, може да го истакнуваат нивното знаме заедно со државното на објектите од јавен и локален карактер, но државното знаме треба да биде една третина поголемо од другите истакнати знамиња.
Павле Беловски