Портпаролот на МВР, Тони Ангеловски, даде краток пресек за текот на изборниот процес од отворањето на избирачките места рано утринава.
Тој информираше дека до сега МВР не регистрирале посериозни нарушувања на јавниот ред и мир при гласањето, како и дека гласањето се одвива мирно без проблеми.
„Од отворањето на гласачките места досега имаме регистрирано две фотографирања на гласачко ливче, едно во Скопје, а едно во Штип. Покрај тоа, во Бучим, радовишко има едно лице кое го покажало гласачкото ливче на набљудувач“, вели портпаролот на МВР.
Информира дека за сите овие настани институциите преземаат мерки за расчистување на случаите.
„Покрај тоа, на територија на општина Чаир се забележани летоци кои биле оставени на паркирани возила, а исто така се испишани и два графити. На едно гласачко место во Скопје покрај испишаниот графит, од страна на претседател на избирачки одбор е пријавено дека во 6.30 часот во ходникот е пронајдена испукана димна бомба. Веднаш се преземени мерки и активности и на ова место гласањето се одвива непречено“, додава Ангеловски.
МВР апелира до граѓаните и учесниците на изборите, во текот на гласањето, до негово завршување, да се воздржат од било какви инциденти.