Безброј остри парчиња стакло разнесени на подот во црквата Св. Атанасиј. Скршени се стаклата на прозорците, а со тоа и мирот на ова место, на тетовското Кале.
Вандалите дошле со една намера – да направат штета и да си заминат. Не одзеле ништо материјално.
Ги центрирале прозорците еден по еден и сите успешно ги погодиле. Нанесена е сериозна штета, реагираат од Тетовско-Гостиварската Епархија.
Тие утрово пријавиле во полиција, за упадот на манастирскиот имот.
„Ова е време на големиот пост кога христијаните се подготвуваат за Христовото Воскреснување, а нашите сограѓани муслимани се во рамазански пости, па оттаму сметаме дека ова би требало да е време за преиспитување, созревање и будење на човечност“, се вели во дел од соопштението на Тетовско-Гостиварската Епархија на МПЦ-ОА.
Вандалите пред да ги кршат стаклата на прозорците, го искршиле и катанецот на влезната врата на црквата. Случајот го потврдија и од Секторот за внатрешни работи Тетово.
По пријавата, бил извршен увид и се преземаат мерки за расчистување на случајот, велат од тетовската полиција.
Црквата вторпат е мета на сквернавење, во краток временски период. Пред десетина дена, непознати сторители поставиле знаме на Албанија на куполата на црквата и обележје на „УЧК“ на манастирскиот имот.
Директорот на Комисијата за односи со верските заедници, Даријан Сотировски прашува – колку пати треба да се повтори вандализирањето, пред да реагираат институциите?!
„Згрозен сум од тенденцијата и од насоката во којашто се развиваат односите особено во Полошкиот регион. Ценам дека е срамен и психопатски чин на сторителите, да вандализираат храм којшто никому и на ниеден начин не може да наштети. Во време кога двете најзастапени религии се во најсветите пости, кога луѓето треба да ги покажаат своите најдобри страни и да ги јакнат на сметка на оние најслаби, нечовечки чувства коишто секој човек може да ги пројави и да ги потиснат, да ги уништат во себе – нам нѝ се случува вакво нешто што нѐ враќа назад“, вели Даријан Сотировски, директор на Комисијата за односи со верските заедници и религиозни групи, во изјава за Телма.
„Суштината на проблемот е во неказнивоста“ оценува Сотировски и повикува, целото општество да застане на патот на „квази-националистичкиот пубертет“.
Петар Догов