Не зборува македонски јазик, а и ретко комуницира со вработените.
Извори од Клиниката за токсикологија, за Телма брифираат дека точни се пишувањата во дел од медиумите – организациската директорка комуницира со преведувачи, а во болничките ходници била придружувана и од татко ѝ.
На оваа позиција е назначена Бесија Иљази пред точно еден месец. Досега присуствувала на еден работен колегиум, но со преведувач – брифираат нашите извори.
Преведувачи ѝ се двете секретарки вработени на Токсикологија, објави веб-медиумот МКД.мк, кои први обелоденија за скандалот на клиниката.
„Бесија Иљази е назначена за организациски директор на Клиниката за токсикологија на 14 февруари оваа година. Секоја универзитетска клиника според Законот за здравствена заштита треба да има по двајца директори, еден медицински и еден организациски директор“, се вели во дописот од Министерството за здравство.
Ова е единствениот официјален допис кој го добивме од Министерството за здравство. Телма се обиде да стапи во контакт и да добие став од министерот за здравство, Демири, но безуспешно.
Организациската директорка на Токсикологија е назначена и покрај тоа што во ресорот здравство помпезно се најавуваше укинување на оваа позиција.
Поранешниот министер за здравство, Меџити, уште пред десет месеци најави дека се разгледува можноста скопскиот Клинички центар „Мајка Тереза“ да функционира со еден генерален директор од јануари годинава.
Клиниките функционираат како посебни установи уште од пред речиси две децении.
Триесетина организациски директори ја чинат државата и до половина милион евра годишно, велат пресметките.
Петар Догов