Вчера заврши петтото издание на „Охрид ултра треил“ маратонот што се одржа во Охридско-Преспанскиот регион и Националниот парк Галичица. Се одржаа четири трки, а на најтешката делница од 107 километри триумфираше Иван Радев.
Македонскиот натпреварувач успеа да ја победи конкуренцијата со време од 14 часа, 36 минути и 17 секунди. Зад него финишираше уште еден Македонец, тоа е Антонио Каранфилоски, додека трет беше Јапонецот Кеисуке Минами. Во женска конкуренција славеше уште еден наш натпреварувач, Катерина Шиповиќ и тоа пред Ивана Јовановска, а место на подиумот имаше и за Сандра Ганглоф од Франција.
На трката наречена Галичица Треил на 65 километри победи Константинос Јанополус од Грција со време од седум часа, 34 минути и 54 секунди. Втор беше Мартин Јакубис од Словачка, а трет финишираше Македонецот Алек Апостоловски. Кај жените, славеше Стефани Маурер од Швајцарија, пред Сања Најдовски и Ивана Ченериќ од Србија.
Уран Ахмети од Косово беше најдобар на трката на 40 километри, а во женска конкуренција славеше Алена Пабортсава од Црна Гора. На најкратката делница од 22 километри победници се Златко Николов во машка и Елена Ртоска во женска конкуренција.
На овогодинешното издание на „Охрид ултра треил“ маратонот учествуваа вкупно 371 натпреварувач во сите трки и конкуренции.
Сите резултати можете да ги погледнете детално ТУКА.