Месеци и години поминати во чекање, протести, преговори и убедувања и сепак трошка надеж за пациентите со цистична фиброза. Сакаат да слушнат само два збора – „има лек“. И добија таква вест.
На точно еден месец по смртта на Благојче Илиевски, кој почина чекајќи терапија, надлежните се пофалија со веста дека е донесен современиот лек „Трикафта“ во Македонија. Официјално, има доволно за осум пациенти, а обезбедено преку интервентен увоз.
Сѐ уште не се познати имињата на пациентите кои се први на списокот, но логиката вели – најкритичните дека ќе бидат први во редот.
„Ќе видиме како ќе ги решаваат работите и како ќе започне имплементацијата затоа што тоа сѐ уште е под знак прашалник и тие информации ние засега ги немаме. Мислам дека работите ќе се движат добро со оглед на тоа што некои пациенти веќе започнуваат со користење на лекот „Трикафта“. Тоа е една позитивна работа којашто досега не ни беше ниту замислива“ вели Фики Гаспар, претседател на Асоцијацијата за цистична фиброза.
Веќе се примаат во болница пациентите кои треба да ја примат терапијата. На Детската клиника се шест од нив, а двајца на Пулмологија.
Терапијата е таблетарна и се дава еднаш месечно. Пациентите се подготвуваат во болница, а таблетите ги пијат дома, велат медицинарите.
Количините од оваа набавка се доволни за една година, а во рамки на буџетот може да се обезбеди „Трикафта“ и за уште неколку пациенти.
„Очекуваме да започнеме со терапија овие денови, кај некои од пациентите уште од утре. Се надеваме на позитивен ефект во однос на подобрување на нивната белодробна функција, подобрување на квалитетот на животот, на нутритивниот статус, намалена зачестеност на хоспитализациите и секако поактивен живот на овие пациенти. Дадовме барање до ФЗО дополнително и во рамките на истиот буџет да бидат вклучени уште четири пациенти“ изјави Проф. Д-р Стојка – Нацева – Фуштиќ, директор на Клиниката за детски болести.
Новиот министер за здравство не истакна многу детали на прес-конференцијата. Тој вчера се сретнал со претставници на Асоцијацијата за цистична фиброза.
Проекциите се дека до крајот на годинава ќе се обезбеди лекот за триесет пациенти.
„Работиме на изнаоѓање решенија за останатите пациенти засегнати со оваа дијагноза“ само кратко откри Фатмир Меџити, министер за здравство.
Во меѓувреме, месецов се очекува да започне и процедурата за измена на трите закони со кои ќе се олесни увозот на лекот „Трикафта“ во земјава.
Станува збор за законот за јавни набавки, Законот за лекови и Законот за здравствено осигурување.
Петар Догов