Грчките граѓани се разбудија денеска со вест за трагична железничка несреќа која се случи ред полноќ, во северниот дел од државата. Најмалку 36 луѓе ги загубија животите, а 85 се повредени во директниот судир на еден патнички и еден товарен воз. Патничкиот воз патувал од Атина кон Солун додека товарниот воз од Солун кон Лариса.
Во стравичниот судир, речиси, целосно се уништени првите два вагона во патничкиот воз, откако биле зафатени со голем пожар. Набргу по несреќатата, на местото пристигнале голем број на амбулантни возила и пожарникари кои започнале да ја пребаруваат локацијата и да трагаат по евентуално преживеани луѓе.
Со патничкиот воз патувале околу 350 луѓе, најголем дел од нив млади луѓе кои се враќале во своите студентски домови во Солун, по одморот за празникот Прочка, пренесуваат грчките медиуми. Двата воза патувале со голема брзина во моментот на несреќата, бидејќи не знаеле дека одат во директен судир еден кон друг.
Околу 20 до 25 луѓе засега се водат како исчезнати, но дел од нив можеби се луѓе кои го напуштиле местото на трагедијата и се оддалечиле. Она што никому не му е јасно во моментот е како воопшто можела да се случи трагедијата.
Грчката национална телевизија ЕРТ јави дека полицијата разговара со шефот на смена на железничката станица во Лариса, а обвинителите дополнително треба да одлучат дали тој ќе биде уапсен.
Особено тешка и траорна е ситуацијата во болниците каде од најблиските роднини на загинатите се бара да ги идентификуваат посмртните останки на своите сакани од кои дел се ужасно изгорени во трагедијата.
Во државата е прогласена и тридневна национална жалост.
Никола Илиевски