Четириесет и седумгодишен маж и триесет и деветгодишна жена се најдени покрај зграда во центарот на Скопје на булеварот Климент Охридски.
Мажот бил починат кога стигнала полицијата, додека девојката била во несвест и во многу тешка состојба. Првичните претпоставки се дека двајцата настрадале при пад од зградата во чија близина се најдени. Полицијата засега не соопштува дали станува збор за несреќен случај, самоубиство или убиство.
Девојката е пејачка во позната рок група од Скопје. Таа е префрлена на клиниката КАРИЛ. Од клиниката за Телма кратко кажаа дека повредената жена е во тешка и критична состојба, со многу скршеници и без свест.
Во истрагата која трае, полицијата пак очекува да дознае повеќе детали за мистериозната трагедија по подобрувањето на здравствената состојба на повредената девојка.
„На 12.02.2023 во 12.57 часот во СВР Скопје било пријавено дека пред зграда на бул.„Климент Охридски“ биле пронајдени паднати Ф.М.(47) и К.Г.(39), двајцата од Скопје. Лекар од Итна медицинска помош кај Ф.М. констатирал смрт, а К.Г. со тешки телесни повреди била пренесена во Комплексот клиники „Мајка Тереза“ за укажување помош. Увид бил извршен и се преземаат мерки за расчистување на случајот“, се вели во соопштението на Министерството за внатрешни работи.