Во трката за шеф на скопското вишо обвинителство остана уште кандидатот Мустава Хајрулахи, актуелен шеф на функцијата, откако по обвинителката Фатиме Фетаи својата кандидатура ја повлече и кандидатот Бурим Рустеми. Тој ваквата своја одлука за БИРН ја правда со став дека шансите за негова победа биле мали.
Хајрулахи е шеф на скопското обвинителство од 2018 година. Рустеми и Фетаи беа дел од СЈО.
Лани медиумите пишуваа дека Скопското вишо јавно обвинителство со кое шефуваше Хајрулахи го „заробило“ предметот на СЈО „Титаник 3“ за изборен фалсификат, во кој беа обвинети Ејуп Адеми и Исмет Гури од ДУИ, на начин што списите не биле навремено испратени во скопскиот Апелациски суд за судиите да одлучуваат за предметот. Поради овој случај опозициските партии Алијанса за Албанците и Левица го обвинуваа Хајрулахи за блискост со функционери на ДУИ.