Властите ги уверуваат граѓаните да не стравуваат дека ќе останат со празни ладилници во претстојната зима.
Кризата тропа на портите, во најава се тешки месеци, но храна и земјоделски култури има во доволни количини годинава.
Оваа порака ја испрати министерот за земјоделство од говорницата, запрашан околу тоа дали државата е подготвена за презимување.
Ќе се контролира и растот на цените.
Владата неделава на седница донесе одлука да се забрани извоз на пченица и брашно меѓудругото, за да се спречат сериозни пореметувања на пазарот.
„Ние активно и секојдневно преку Царинската управа следиме дали одредени компании се однесуваат неодговорно, неморално или неетички и одржавме состаноци каде што јасно и прецизно ја пративме пораката дека поддршката со парите на граѓаните првенствено треба да биде за задоволување на потребите од храна. Таа цел ја остваруваме. Граѓаните воопшто не треба да се грижат дека ќе имаме проблем во делот со количините на храна“ изјави Љупчо Николовски, министер за земјоделство, шумарство и водостопанство.
Уверливи тонови пристигнуваат и од друга адреса – Министерството за економија.
Таму, министерот Бектеши зборуваше околу количините на храна како залиха, но и инспекциските контроли. Во криза се профитира, но на институциите е преку инспекции да го спречат тоа.
„Јас сум убеден дека ќе имаме доволно пченица и други земјоделски производи – и како репроматеријали и како суровини имајќи ги предвид податоците што се доставени од страна на Министерството за земјоделство. Во делот на маржите наведов дека Државниот пазарен инспекторат и Управата за јавни приходи прават редовни и вонредни контроли. И ДПИ и УЈП ќе имаат и други механизми се со цел да не се прави злоупотреба врз грбот на граѓаните, во делот на шпекулациите со цените на прехранбените производи“ изјави Крешник Бектеши, министер за економија.
Во меѓувреме, денес е објавен нов јавен повик до земјоделците, од програмата ИПАРД 2.
Станува збор за повеќе од пет милиони евра инвестициски фонд за проекти. Заинтересираните кандидати ќе може да аплицираат со проекти за машини и опрема за производство и преработка на млеко, месо, овошје и зеленчук, преработка на житарици и друго.
Ќе се субвенционира и поставувањето фотонапонски панели за производство на енергија за сопствени потреби.
Петар Догов