Генерално во опција се три сценарија, изјави во вечерашната Топ Тема, аналитичарот и поранешен разузнавач и заменик министер за надворешни работи, Зоран Петров, на прашањето како ќе заврши руската воена инвазија на Украина.
„Едното е да се преговара, откажување од НАТО, денацификација , демилитаризација и воена неутралност и да се разговара за статусот на Донбас, двете независни републики. Ова е сценарио кое претставува пораз на Путин. Второто е поделба на Украина, по должината на реката Дњепар, нејзина елиминација од излез на море. Поделба на два дела, тоа е сценарио кое е пораз на Украина и со кое државата ќе влезе во долгорочна дестабилизација, доаѓање на екстремни политички структури и извоз на дестабилизација во цела Европа. Третото сценарио кое исто така има потенцијал да се реализира бидејќи делови од него веќе гледаме. Тоа е водење војна до исцрпување. Водење војна до исцрпување на двете страни, бидејќи тогаш ќе се реализира една прикриена цел на Путин. Една од можните цели е дестабилизација на континентот, бидејќи веќе се појавуваат поделби во Европската Унија. Очигледно е дека веќе има дисонантни тонови во ЕУ за воведување на 5-ти пакет на мерки против Русија“ – вели Петров.
„Гледаме дека работите одат поинаку. Дека Украина е преземена во клешта, под притисок е на север и долу на југот на земјата и најверојатно таа клешта некаде ќе треба да се затвори. А ако се затвори, ќе се затвори најверојатно од левата страна на Дњепар“ – изјави новинарот Мирче Адамчевски.
Тоа би значело поделба на Украина, што би било катастрофален исход и излегување на Русија на границата со Молдавија.
Мислам дека најблиску се оние кои што велат дека Русија ќе се задоволи со контрола на Крим, на Донбас и делот од Мариупол, Херсон, Одеса, вели Адамчевски.
Двајцата гости во Топ Тема го потенцираа и стратешкото значење на Мариупол, Украинското пристаниште на Азовското море, каде се водат најжестоките борби , затоа што со негово освојување Русија ќе си обезбеди директна врска по земја меѓу Крим и регионот Донбас.