Од денеска се ставени во функција ноќните линии на Јавното сообраќајно претпријатие Скопје и тоа со 11 автобуски линии: 2, 5, 7, 22, 24, 41, 50, 57, 61, 63 и 65Б. Воведувањето на ноќни линии е почеток на промените за подобар јавен градски превоз што е дел од програмата на раководството на ЈСП и на Градот Скопје, соопштија од град Скопје.
Автобуските линии 2, 22, 24, 41, 57 и 65Б, ќе сообраќаат секој ден, а преостанатите ќе бидат во функција во деновите од викендот или комбинирано, како и за време на празниците.
Сите детали за возниот ред и трасите на ноќните линии се достапни на веб страницата на ЈСП Скопје (http://jsp.com.mk/vest.aspx?vest=2300).
Ноќен превоз не се применуваше од почетокот на пандемијата. Од град Скопје соопштија дека со потегот „за скопјани се обезбедува јавен превоз и за време на ноќните часови, што беше укинато како опција од минатото раководството на Градот пред две години.“
Од вчера пак на сила се мерките против загадување со што е воведен бесплатен превоз со градските автобуси, а градот Скопје им препорача на скопјани да ги остават автомобилите и доколку имаат потреба од излегување да користат градски превоз.