Печатницата Киро Дандаро привршува со печатењето на гласачките ливчиња. Деновиве ќе заврши, откако ДИК ќе го утврди и потпише изгледот на ливчето за секоја од 80-те општини и градот Скопје. Потоа, ќе се печати Избирачкиот список. Вчера е потпишан согласно законскиот рок. Двајца членови на ДИК одбија да го потпишат изводот за две општини: 700 жители на Чучер Сандево ќе гласаат во Бутел.
Ова е дел улиците Призренска и Бутелска. Повеќегодишното постапување и повлекување меѓуопштински граници на градот, неколу општини, МВР, Централниот регистер и други институции, смести неколку краци на овие улици во општината Чучер Сандево, односно, надвор од градот Скопје. Но, 680 жители не ги сменија личните карти и останаа пријавени како жители на општината Бутел.Таму и ќе гласаат на локалните избори, иако живеат во друга општина. Избирачкиот список е заклучен, вчера беше потпишан, иако двајца членови на ДИК не сакаа да го потпишат изводот на списокот во овој дел.
Од Одделението за водење Избирачки список велат дека ова не е единствен ваков случај. Стотици граѓани гласаат во друга општина од местото на живеење поради грешки со адресите и со имињата на улиците. За да се поправи тоа, секој граѓанин поединечно треба да поведе управна постапка и да ја смени личната карта. Од ДИК велат дека иако се надлежни за списоците, мора да ги почитуваат податоите во личните документи.
До утре, во ДИК треба да заврши и утврдувањето и потпишувањето на гласачкото ливче за сите единици на локалната самоуправа. 70-тина од нив веќе се испечатени во печатницата „Киро Дандаро“ и предадени на општинските изборни комисии. Преостанати се десетина гласачки ливчиња за кои се вршат дополнителни проверки за исправноста на имињата на кандидатите кои припаѓаат на заедниците, објаснува претседателот на ДИК, Александар Даштевски. Уверува дека и овие и другите подготовки на изборите течат непречено и ќе завршат на време за спроведување локални избори на 17-ти октомври.
Соња Николовска