Вулгарна и негативна, наспроти културна и коректна кампања. Аналитичарите различно ја оценуваат кампањата во македонскиот и албанскиот блок на партии која завршува вечерва на полноќ. Марко Трошановски од Институтот за демократија смета дека силната негативна компонента на кампањата ќе мобилизира многу мал дел од неопределените, а излезноста ќе ја направат партиските поддржувачи.
Кампањата на ДУИ, пак, Трошановски ја оценува како моноетничка. Вели дека се затскрива зад концептот на мултиетничност, но целата аргументација е еднострано етничка, за разлика од граѓанската коалиција за која смета дека ќе го зголеми рејтингот на владејачката партија.
Аналитичарите од албанскиот блок имаат спротивен став. Џелал Незири вели дека, иако се чини дека преовладуваа големите каузи, ова беше една од најквалитетните кампањи. За првпат се третирале поконкретни проблеми на Албанците, во поглед на намалување на невработеноста и миграцијата на младите. Смета дека тоа ќе ја зголеми излезноста во шестата изборна единица, каде последните изборни циклуси е помала од 50 проценти, токму поради отсуството на конкретни решенија и идеи.
Завршните митинзи се вечерва, а од полноќ почнува изборниот молк. Гласањето за првпат ќе трае три дена поради ситуацијата со корона вирусот. Утре ќе гласаат лицата кои се во домашен карантин заради позитивен тест на Ковид-19 и лицата на кои им е определена мерка самоизолација. Тие ќе бидат посетени во своите домови, од страна на посебен избирачки одбор, формиран од ДИК.
Немоќните и хронично болни лица, раселените и затворениците ќе гласаат во вторник.
За првпат гласањето ќе трае два часа подолго, од 7 до 21 часот. Гласањето ќе се одвива според безбедносни протоколи, со маски и на дистанца.
Граѓаните ќе избираат меѓу кандидатите на 15 коалиции и партии. Право на глас имаат 1.814.263 граѓани запишани во Избирачкиот список.
Далиборка Демјанска Цветановска