742 лица побарале да гласаат во понеделник во домашни услови. Нивните пријави се упатени до општинските комисии, кои ќе треба да проверат дали сите ги исполнуваат условите, односно дали поседуваат валидни лични документи и решение за изолација.
Во понеделник, нема да се гласа во Арачиново, Радовиш, Чучер Сандево, Дојран, Центар Жупа, Чашка, Виница, Градско и во уште неколку, вкупно 22 општини. До нивните комисии не е пристигната ниту една пријава. Во текот на денот,се докомплетираа уште 32 посебни избирачки одбори кои в понеделник треба да го спроведат гласањето. Избрани се нови 50-тина здравствени работници, поради изземање на претходните. Од 300 здравствени лица, дури 130 побараа замена.
Евентуалните злоупотреби на правото за изземање, ќе бидат разгледувани дополнително, најавува ДИК.
За гласање во вторник се пријавени 9 илјади 465 болни и изнемоштени лица. Нивното гласање во домашни услови ќе го реализираат редовните избирачки одбори. Во среда, на 15-ти јули, ќе се гласа од 7 до 21 часот на 3 илјади 390 избирачки места, а на 90 нема да има гласање бидејќи на избирачките списоци се водат помалку од 10 гласачи. Изборната кампања завршува в недела, по што следи тридневен молк.
Соња Николовска