Обединетите нации ги повикуваат владите ширум светот да донираат 4,4 милијарди долари за спасување животи во Авганистан на денешната донаторска конференција.
Германската министерка за надворешни работи Аналена Баербок изјави дека ќе присуствува на онлајн конференција организирана од Катар, Велика Британија и Германија.
Ќе учествуваат и претставници на авганистанското граѓанско општество, иако конференцијата беше во сенка на неодамнешната најава за ограничувања наметнати на жените и девојките од страна на Талибанците.
Според ОН, 24,4 милиони луѓе во Авганистан моментално се зависни од хуманитарна помош за да преживеат – речиси 60 отсто од населението.
На авганистанското население како целина моментално му е потребна три пати повеќе хуманитарна помош од 2021 година.
Половина од авганистанското население гладува. Финансиската помош треба да се користи за финансирање на храна, здравствена заштита, образование и засолништа, како и мерки за заштита на ранливите луѓе.
По повлекувањето на меѓународните сили, падот на владата поддржана од САД во Кабул и враќањето на талибанците на власт во август 2021 година, авганистанската економија ослабе за речиси една третина.
Скратена е и помошта за развој на земјата, замрзнати се резервите на авганистанската централна банка, а ниту една друга земја не ја признала талибанската влада.