Над 1.000 јавувања од граѓани се регистрирани преку бројот на итни повици 112 поради невремето проследено со силен ветер што попладнево го зафати Скопје, информираат од Центарот за управување со кризи (ЦУК).
„Во Скопје е пријавена падната кровна конструкција од зграда на ул. „Женевска“ бр. 10, пришто се оштетени повеќе патнички возила. Регистрирани се и паднато дрво врз моторно возило на ул. „Методија Митевски“, паднато дрво на ул. „Никола Тримпаре“, како и падната кровна конструкција на ул. „Трифун Бузев“. Исто така, пријавено е дека дел од кровната конструкција на ООУ „Владо Тасевски“ е откорната од силниот ветер. На ул. „Хелсинки“ бр. 5 се регистрирани две паднати дрвја, додека на ул. „Скупи“ бр. 89 паднати дрвја оштетиле електрични кабли, патничко возило и дел од куќа“, соопштија од ЦУК.
Во Куманово е пријавена падната кровна конструкција на булевар „Октомвриска револуција“.
„За сите пријавени настани се известени и постапуваат надлежните служби, кои се на терен и работат на расчистување и отстранување на последиците од невремето“, додаваат од ЦУК.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.