Во недела на 5 април главниот град ќе биде домаќин на едно од највозбудливите спортски случувања во земјава – 9-то издание на меѓународната планинска трка „Водно-Матка треилс 2026“.
Настанот, кој е во организација на спортската асоцијација ТРЕКС, ќе ги собере љубителите на планинското трчање и природата на три различни дистанци: 50 километри, 30 километри и 18 километри, како и детски трки. Стартот и целта на сите трки е лоциран во автентичниот амбиент на Етно комплексот „Македонско Село“ во Горно Нерези.
„Водно-Матка треилс не е само трка, туку промоција на здравиот живот и природните убавини околу Скопје. Оваа година имаме исклучителен интерес и подготвивме патеки кои нудат вистински предизвик за професионалците, но и уживање за рекреативците“, изјави Дејан Крле, директорот на трката.
Организаторите ги покануваат сите граѓани да дојдат во Македонско Село и да ги бодрат натпреварувачите во финиш зоната, и заеднички да го прославиме спортскиот успех на секој учесник.
Поради одржување на меѓународната трка „Водно-Матка треилс“, во недела (05.04.2026), ќе биде воспоставен привремен режим на сообраќај на патот од Македонско село до џамијата во Горно Нерези – сообраќајот ќе биде привремено запрен во три периоди секој од времетраење од 5 минути после секој старт за да поминат тркачите безбедно (во 7, 8 и 9 часот).
Клучни информации за настанот:
- Старт: Недела, 05.04.2026, со почеток во 07:00 часот (50К), 08:00 часот (30К) и 09:00 часот (18К).
- Локација: Етно комплекс Македонско Село, Горно Нерези