Со почит кон 63-те жртви и околу 200 повредени во пожарот во кочанската дискотека „Пулс“, општината, семејствата на загинатите и на повредените, државните и локалните институции се подготвуваат за одбележување на годишната од најголемата трагедијата во поновата македонска историја.
Три дена ќе има настани, почнуваат од 14 март, сабота со молитвено сеќавање и помени на гробиштата во Кочани. Во недела во спомен на жртвите ќе се трча, ќе има планинарски марш, а дел од повредените млади луѓе ќе имаат и натпревар во кошарка, на овој ден ќе има промоција на книга и музичко-балетски перформанс. На 16 март настаните почнуваат токму од пред дискотеката „Пулс“.
- Во 2.15 ќе оддадеме почит пред Пулс, под мотото „2.32 светлина што останува”. Во 8.45 во градскиот парк ќе бидат поставени 63 бели столчиња, кои ќе ги симболизираат 63 животи на прерано починатите дечиња. Во 9.00часот ќе пристигнат делегациите, а во 10.30 е предвидено да започне комеморативната седница, изјави Владко Грозданов градоначалник на Кочани.
Досега се најавени над 70 делегации од амбасади, лекари и медицински персонал од болниците каде повредените се лекуваа. Приемот ќе биде во паркот во Кочани. Се апелира жителите на Кочани во текот на овие три дена низ центарот да се движат пеш или со велосипед, со цел достоинствено да се пречекаат делегациите.
- До сите институции, јавни, приватни, сите правни субјекти и сите чинители кој работат во овој град ослободете ги вработените во периодот во кој следува за да сите заедно достоинствено и чесно оддадеме почит, вели Грозданов.
Повик се упати до земјоделците во денови на тага да не ги палат стрништата. Владата денеска најави дека на 14 март во Скопје ќе организира Меѓународна конференција за пожарот во Кочани, а на која ќе учествуваат лекари и медицински ескперти од 37 земји.
Викторија Јованова
Б.С.