Цената на суровата нафта „брент“ порасна за околу 10% и достигна 80 долари за барел во вонберзанско тргување, по нападите на САД и Израел врз Иран.
Аналитичарите предупредуваат дека доколку кризата се продлабочи, цената може да порасне и до 100 долари за барел, особено ако дојде до подолготрајно затворање на Ормускиот теснец, преку кој поминуваат повеќе од 20% од глобалните испораки на нафта.
Повеќето сопственици на танкери и трговски компании привремено ги суспендираа испораките на сурова нафта, гориво и течен природен гас низ теснецот, по предупредувањата од Техеран.
Според проценките, евентуалното целосно затворање би можело да предизвика губење од 8 до 10 милиони барели дневно на глобалниот пазар, и покрај алтернативните нафтоводи преку Саудиска Арабија и Обединетите Арапски Емирати.
Меѓувреме, групата ОПЕК+ најави зголемување на производството за 206.000 барели дневно од април, што е релативно скромен раст.
Аналитичарите од повеќе банки очекуваат цените краткорочно да се задржат над 90 долари, додека азиските земји, вклучително и Индија, разгледуваат алтернативни извори како руската нафта за да ги ублажат можните прекини во снабдувањето.