Државниот санитарен и здравствен инспекторат беше предмет на ревизија на финансиските извештаи и усогласеноста за 2024 година.
Ревизорите утврдија дека во делот на инспекцискиот надзор при увоз на стоки постојат ризици, бидејќи фактурите и здравствените сертификати се на повеќе странски јазици, што може да доведе до недоволно проверена веродостојност и безбедност на производите.
Ревизијата покажала и недостатоци во инспекцискиот надзор на санитарно-хигиенската и здравствената заштита, недостасува поткрепувачка документација, пописот не е комплетен, а исплатата на додатоците за работа со висок ризик е неточна.
Дополнително, листата на забранети супстанци во козметиката од 2010 година не е ажурирана, што создава ризик за пуштање во промет на производи штетни по здравјето на граѓаните.
Во извештајот на ревизорите исто така се укажува на недоволна техничка опременост на државните лаборатории за испитување на забранети супстанци во козметички производи и детски играчки.