Европската унија го повика Белград да ги почитува заедничките темелните вредности пред најавите за големиот митинг најавен на 15 март и информациите кои ги објави претседателот Александар Вучиќ дека се подготвуваат насилства и се закани со апсења.
Во пораките од ЕУ се вели дека учеството на граѓаните игра витална улога во развојот на здраво и демократско општество, вклучително и промовирање на транспарентност и одговорност.
„ЕУ постојано повикува на деескалација на тензиите, преку воспоставување услови за инклузивен дијалог во кој ќе бидат вклучени сите засегнати страни, вклучително политичките актери, институциите и членовите на граѓанското општество, со цел да се решат реформите неопходни за иднината на Србија во ЕУ“, вели Брисел.
Претставниците на ЕУ потврдуваат дека внимателно ја следат актуелната внатрешно-политичка ситуација во Србија и големата мобилизација на студенти и други групи.