Ако јас сум кума на хаосот, ти си гробар на јавниот превоз, му возврати градоначалничката на Скопје, Данела Арсовска на премиерот Христијан Мицкоски. Нејзината реакција доаѓа како одговор на соопштението на ВМРО-ДПМНЕ во кое Арсовска се опишува како самопрогласена реформаторка на јавниот превоз која го довела Скопје до раб на колапс.
„Реформата на јавниот сообраќај која ја споменуваш „патриоту” Мицкоски, ти ја вети заедно со мене пред скопјани, ти ја саботираш таа реформа, ти го колабираш со своите полтрони советници јавниот превоз. Мицкоски, ти не гласаш за нови автобуси, затоа што побарав сите партии во советот на Град Скопје да се вклучат во избор на спецификација и услови за набавка, ама така ти „патриоту” Мицкоски нема да можеш да преговараш со производители на автобуси како што правеше на почетокот на мандатот кога за тебе бев најдобриот менаџер во Европа“, се наведува во соопштението на Град Скопје потпишано од Данела Арсовска.
Нарекувајќи ја самопрогласена реформаторка на јавниот превоз, од партијата на Мицкоски вчера обвинија дека градоначалничката го довела Скопје на раб на колапс. Од владејачката партија вчера рекоа дека советниците на ВМРО-ДПМНЕ се подготвени да го поддржат предлогот за набавката на нови автобуси, ако Арсовска е подготвена да покаже отчетност пред граѓаните.
„Во спротивно, ова апокалиптично сценарио на коешто скопјани се принудени да се адаптираат секојдневно ќе продолжи. Пешачење со километри, доцнење на работа стана секојдневие затоа што неспособноста на Арсовска го сведе јавниот превоз да стане мисловна именка“, обвинија од ВМРО-ДПМНЕ.
