Мислам дека Македонија треба да има добри односи со сите држави од регионот, посебно со државите од Западен Балкан со коишто претендираме заеднички да влеземе во ЕУ, рече кандидатот за претседател Арбен Таравари во вечерашното интервју за Телевизија Телма. Во неговата програма предвидува излегување на Македонија од иницијативата Отворен Балкан поради тоа што во неа недостасуваат најголемиот дел од државите во Западен Балкан. Посочувајќи Берлинскиот процес, Таравари рече дека тој е многу постар од Отворен Балкан и за разлика од оваа иницијатива Берлинскиот процес е сеопфатен.
Од таа причина, Таравари смета дека Македонија треба да преземе посериозна улога и да помогне во нормализацијата на односите меѓу Белград и Приштина.
Мислам дека Косово е наш сосед, исто како Србија, Албанија, Грција и Бугарија, ние мораме да помогнеме во процесот на стабилизирање на цел регион и во тој правец инсистирам што побргу да се разреши тој грч меѓу Косово и Србија. Јас се надевам и сум оптимист дека ќе се најде решение, рече Таравари.