Повикани на средба само да бидат присутни, но не и да предлагаат решенија за својот живот. Пациентите со цистична фиброза ќе ги чекаат законските измени во Собрание, за да го добијат лекот „Трикафта“. Засега лекот ќе се набавува интервентно, но само за осумте најкритични заболени. Преговорите за интервентната набавка на „Трикафта“, според информации на Телма, се завршени меѓу Детската клиника, каде ќе се лекуваат, и македонскиот претставник на фирмата Вертекс.
Преговорите за првата интервентна набавка на лекот, според информации на Телма, завршиле со договорена цена која е пониска од 300.000 евра. Максималниот рок за пристигнување на првата „Трикафта“ во Македонија е еден месец, иако и болните и надлежните клиники се надеваат дека ќе пристигне за две недели.
За да се овозможи директна набавка на лекот „Трикафта“ од производителот Вертекс, мора да се изменат три закони и да се дозволи државата да преговара директно со фирмата-проиводител Вертекс која го има и патентот. Премиерот Ковачевски денеска повтори дека ќе има измени, но не прецизираше дали се готови законските измени, ама веќе побара од пратениците да го подржат законот. Истото го кажа и кога почина 45-годишниот Благојче Илиевски, минатата недела.
Една недела подоцна, предлог законите не се напишани за да стигнат до Парламентот. Во Собранието во тек е реконструкција и разрешување на министрите кое не се знае кога ќе заврши. Владата ги пишува законските измени и ги испраќа до Собранието, а тие поминуваат низ надлежните комисиии и тогаш се гласа. Таа процедура не е ни почната, а кога ќе почне во Собрание, спасот на болните е оставен во рацете на пратениците.
Симона Петровска