Вчера во вечерните часови Романец се изгубил на Матка, по што го повикал итниот број за случаи. Центарот за управување со кризи го примил повик од странскиот државјанин кој се изгубил при самостојно движење во реонот на Матка, во близина на пештерата Врело, на подрачјето на Општина Сарај.
„Веднаш по приемот на пријавата, ЦУК ги презеде сите неопходни активности и ги извести Министерството за внатрешни работи (ЦИК Скопје), Дирекцијата за заштита и спасување и Црвениот крст на Република Северна Македонија, со барање за нивно вклучување во потрагата“, стои во соопштението на ЦУК.
Лицето било во постојан контакт со надлежните служби кои успеале да го лоцираат. Континуирано му давале насоки на движење со цел полесно да биде пронајден. Во потрагата, со теренско возило, активно се вклучи и директорот на Центарот за управување со кризи, Мухамед Али, како поддршка на полициските екипи.
Странскиот државјанин бил пронајден во утринските часови, а истиот били видно испаничен и дезориентиран, со знаци на стабилна здравствена состојба. По пронаоѓањето бил пренесен во Полициската станица Сарај, каде што Министерството за внатрешни работи презема понатамошни мерки согласно своите надлежности, имајќи предвид дека станува збор за лице од друга држава.
