Групацијата за производство на цигари и Здружението на производители на тутун се загрижени и разочарани од измените во Законот за заштита од пушење, кои според нив нема да ги постигнат посакуваните резултати за јавното здравје.
„Предложените мерки не водат кон намалување на употребата на тутунски производи, туку поттикнуваат одлив кон сивата економија, која веќе достигнува 13–14% од пазарот, со неконтролирана продажба, небезбедни производи, прекугранично снабдување и сериозни загуби за буџетот“, пишува во реакцијата.
Нивните анализи покажале дека прекумерните рестрикции, нема да ја намалат преваленцата на пушење, туку ќе доведат до раст на нелегална трговија со тутунски и никотински производи, снабдување со производи од соседни држави со непроверен квалитет и доведување во ризик на здравјето на граѓаните од производи кои не ги поминуваат потребните проверки за безбедност и квалитет. Понатаму, ќе се предизвика и сериозен пад на буџетските приходи, на сметка на раст на нелегалната трговија и нарушување на целиот синџир на вредност.
Тие додаваат и дека ниту една од нивните забелешки не е прифатена во новата верзија на законот, дека законот содржи одредби кои не се применливи кои се далеку од европските практики и директиви.
„Дали министерството за здравство при креирање на законот ја вклучи и стратегијата како државата ќе се справи со одливот кон нелегалниот пазар, недостапноста до легални производи и последиците врз целокупната економија предизвикани од падот на буџетските приходи?“ прашуваат тие.
Во Групацијата за производство на цигари и Здружението на производители на тутун при Стопанската комора на Македонија, членуваат Philip Morris International, Imperial Brands, British American Tobacco и Japan Tobacco International.